ATLETA TIMOROAN NA'IN-58 SEI PARTISIPA IHA ASIAN GAMES BA DALA-19 IHA HANGZHOU XINA
Dili, 13 Setembru 2023 - Primeiru Ministru, Kay Rala Xanana Gusmão, Kuarta (13/09) iha Palásiu Governu, Dili hasoru malu ho atleta Timoroan hamutuk na’in-58, ne'ebé sei reprezenta Timor-Leste hodi ba partisipa iha jogu ASIAN nian (ASIAN Games) ba dala-19, ne'ebé sei hahú iha loron 23 fulan Setembru tinan 2023 to'o 08 Outubru 2023 iha Hangzhou Xina.
PM Xanana hameno ba atleta sira hotu atu tau-an hanesan embaixadór desportu nian hodi kompete ho profisionál no hamorin imajen desportu Timor-Leste nian. Xanana mós promete katak governu ba dasia sei tau matan ba kondisaun desportu hotu iha rai-laran tuir polítika ne’ebé defini tiha ona.
Atleta na'in-58 ne’e kompostu hosi feto hamutuk na'in-24, fahe ba atleta feto na’in ualu, ofisiál feto na’in-16 no mane na’in-34 ne’ebé mai hosi federasaun 10 mak hanesan, tenis kampu, atletizmu, taekwondo, karate-do, natasaun, federasaun tiru, boxing, federasaun alterofelizmu (hiit besi/todan), badminton, no voliból praia. Tuir planu, atleta hirak ne'e sei aranka hosi Timor-Leste ba Hangzhou Xina iha loron 16 fulan Setembru tinan 2023 no sei filafali mai Timor-Leste iha loron 08 Outubru 2023.
Fonte: Mídia Gabinete do Primeiro-Ministro (GPM)
