Indonézia, 28 Jullu 2021 – Ministériu Saúde Indonézia deteta ona kazu Covid-19 variante Delta Plus iha provínsia Mamuju no Jambi, Indonézia, haktuir informasaun hosi CNN Indonézia.
Tuir informasaun hosi péritu sira katak variante Delta Plus iha kapasidade transmisaun ne’ebé lalais liu.
“Ami hakfodak katak variante Delta Plus ne’e mosu iha Jambi,” dehan Xefe Komisaun Covid-19 Jambi Nirwan Satria iha konferénsia imprensa ne’ebé halo iha kuarta (28/7) ne’e.
Nirwan hateten, to’o oras ne’e hosi nia parte seidauk identifika loloos ema na’in hira mak infetadu variante Delta Plus no sira-nia kondisaun oinsá.
“Maibé ami informa katak Jambi iha ona kazu variante Delta Plus, hanesan mós iha Mamuju,” nia akresenta.
Variante Delta Plus hanesan tipu ida hosi virus SARS-CoV-2 ne’ebé koñesidu ho B.1.617.2.1 ka AY.1 no diferente ho variante Delta baibain. Nia iha kapasidade da’et ho lalais. Aléin hosi Indonézia, molok ne’e variante Delta Plus deteta ona iha Inglatera, EUA, Índia, Kanadá, Japaun, Túrkia, Polándia, Portugál, Rúsia, no Nepál.
Organizasaun Mundiál ba Saúde haktuir, oras ne’e variante Delta Plus seidauk hamosu kazu maka’as maibé komunidade sira tenke toma atensaun nafatin ba nia konsekénsia transmisaun.
Fonte: CNN Indonesia