Dili, 30 Setembru 2021 - Autoridade Nasionál Bee no Saneamentu (sigla portugés, ANAS), I.P, liuhosi Ekipa Diresaun Nasionál ba Saneamentu no Jestaun Rezíduo ne’ebé lidera hosi Diretór Julião de Jesus, halo intervensaun relasiona ho soe bee fo’er ba espasu públiku rezulta hosi atividade fase kareta no hariis fatin iha estasaun mina DESHUN Fuel, Lda., no Mekar Fuel Unipesoal, Lda., no iha uma-kain balu, iha Fatuhada no Bebora, Díli.
Ekipa hasoru malu ho dirijente estasaun mina rua ne’ebé temi iha leten iha Fatuhada hodi husu atu labele soe bee fo’er ba iha fatin públiku.
Ekipa mós rekomenda ba jestór estasaun mina sira atu halo tratamentu ba bee fo’er sira no estasaun mina refere promete sei konstrui fatin ba bee fo’er ne’ebé rezulta hosi sira-nia atividade.
Iha Bebora, ANAS identifika bee fo’er hosi uma-kain balu ne’ebé suli ba espasu públiku, nune’e, ekipa husu atu koordena ho entidade relevante hodi bele solusiona problema refere.
Tuir Dekretu-Lei nú. 33/2008, 27 Agostu, kona-ba Ijiene no Órden Públiku regula iha artigu 4, temi katak halo proibisaun ba hahalok sira hanesan ne’e atu labele fó impaktu ba saúde públiku.
Fonte: Autoridade Nacional Água e Saneamento (ANAP), I.P