Dili, 13 Setembru 2021 – Ministru Turizmu, Komérsiu no Indústria (sigla portugés MTCI) José Lucas do Carmo da Silva halo enseramentu no despedida ho staff pavillaun Timor-Leste ba Expo Dubai 2020 hamutuk na’in-25, iha segunda (13/9) ne’e iha edifísiu CPLP, Dili, ne’ebé remata ona sira-nia formasaun, nune’e, hodi aranka ba Dubai iha 14 Setembru 2021.
Ekipa staff pavillaun na’in-25 ne’e kompostu hosi grupu rua mak hanesan, grupu dahuluk ema na’in-14 no grupu daruak ema na’in-11, no sira tuir ona formasaun kona-ba Excellence Services ho forma intensivu durante loron 26 ne’ebé hahú hosi 16 Agostu to’o 13 Setembru 2021.
Governu haktuir, Bazeia ba rezolusaun Governu Nú. 20/2019, 14 Juñu 2019, ho primeiru alterasaun liuhosi Rezolusaun Governu Nú. 27/2020, 14 Agostu 2020, no segunda alterasaun liuhosi Rezolusaun Governu Nú. 3/2021, 03 fevereiru 2021, kona-ba Nomeasaun Autoridade Nasionál Expo Dubai Timor-Leste (ANED-TL) 2020, konsidera katak, partisipasaun Repúblika Demokratika Timor-Leste iha Expo Mundiál Dubai 2020 justifika potensiál reprezentasaun estreitamente relasaun komersiál ho Estadu sira seluk.
Fonte: Mídia Ministério do Turismo, Comércio e Indústria (MTCI)