Dili, 21 Janeiru 2021 – Konsellu Ministru hala’o sorumutuk extraordináriu ohin (21/01) iha Palásiu Governu, Dili, lidera hosi Primeiru-Ministru Taur Matan Ruak, no deside ona hodi propoin ba Prezidente Repúblika (PR) Francisco Guterres Lú Olo atu ezonera Tenente-Jenerál Lere Anan Timor hosi nia kargu nu’udar Xefe Estadu-Maiór-Jenerál FALINTIL-Forsa Defeza Timor-Leste.
Iha sorumutuk ne’e, Konsellu Ministru mós deside hodi aprova proposta ida hodi nomeia hikas atuál Vise Xefe Estadu-Maiór-Jenerál F-FDTL Falur Rate Laek ba kargu Xefe Estadu-Maiór-Jenerál F-FDTL hodi troka Lere, tuir publikasaun ofisiál hosi parte Governu ne’ebé Timor News asesu ohin (21/01).
Konsellu Ministru mós deside hodi nomeia Brigadeiru Jenerál Calisto dos Santos Coliati ba kargu Vise Xefe Estadu-Maiór-Jenerál F-FDTL, no mantéin nomeasaun Komodoru Pedro Klamar Fuik ba kargu Xefe Estadu-Maiór Forsa Armada.
Fonte: Mídia Gabinete do Primeiro-Ministro (GPM)