Dili, 16 Jullu 2021 – Komité Emerjénsia Organizasaun Mundiál ba Saúde (OMS) alerta katak iha posibilidade boot atu mosu tán Covid-19 variante foun ne’ebé perigozu liu. Ida ne’e OMS halo prediksaun katak sei da’et iha mundu tomak, nune’e difisil liu atu hapara pandemia.

“Pandemia seidauk remata. […] Iha posibilidade forte atu mosu transmisaun emerjénsia globalmente variante foun ne’ebé posivelmente perigozu liu no dalaruma difisil liu atu kontrola,” dehan Xefe Komité Emerjénsia OMS Didier Houssin, haktuir france24.com iha kinta (15/7) ne’e.

Oras ne’e iha ona variante Covid-19 haat mak hanesan Alpha, Beta, Gamma no variante ne’ebé bele da’et lalais liu mak Delta. Maibé Komité Emerjénsia OMS fó hanoin katak ida ne’ebé piór liu sei bele akontese iha futuru.

Maske nune’e OMS la esplika kle’an liu kona-ba rezultadu peskiza ne’ebé sira halo relasiona ho poténsia variante foun atu mosu tán ne’e.

Tuir France24, Diretór Jerál OMS Tedros Adhanom, liuhosi konferénsia imprensa iha kinta ne’e, husu mós ba Xina atu tenke transparante kona-ba orijen loloos hosi virus corona ne’e tanba vítima sira presiza hatene.

“Ami husu Xina atu transparante no nakloke hodi servisu hamutuk,” nia akresenta.