Dili, 14 Novembru 2022 - Primeiru-ministru Taur Matan Ruak, simu investór internasionál hosi Brunei, Malázia, Singapura, Filipina no Xina ne’ebé halibur-an iha Brunei Food and Beverage of the Timorense Manpower Agency, ne’ebé akompaña hosi Embaixadór Timor-Leste nian ba Brunei Darussalam, Abel Guterres, iha Palásiu Governu, Dili. Kompania sira ne’e iha interese atu halo investimentu iha Timor-Leste iha área sira hanesan turizmu, industria, agrikultura, otelaria,  sentru edukasaun, ospitál no setór bankária. 

Hafoin reuniaun, Abel Guterres hateten katak investidór sira mai iha loron hirak liubá, ne’ebé iha sábadu no domingu, sira pasa tempu iha Baukau hodi haree fatin investimentu nian tanba Baukau iha poténsia boot ba futuru investimentu iha área sira hanesan aeroportu, turizmu, otelaria, sentru negósiu, bankária, ospitál, no seluk tán. Nune’e delegasaun sira-ne’e hasoru primeiru-ministru hodi fahe informasaun no rona ninia hanoin kona-ba sira-nia interese investimentu nian.

Abel esplika katak xefe Governu kontente tebetebes tanba investór sira bele mai hodi haree diretamente kondisaun reál Timor-Leste nian no fó benvindu ba iha intrese hakarak investe iha Timor-Leste. Hanesan Governu, prontu kria kondisaun atu fasilita investidór sira hodi bele halo sira-nia investimentu iha Timor-Leste ho seguru.