Dili, 02 Otubru 2023 - Reuniaun Konsellu Ministru (KM) ne'ebé hala’o iha Segunda (02/10) ne'e delibera tiha ona hodi aprova tetu despeza Orsamentu Jerál Estadu (OJE) ba tinan 2024 nian hamutuk billaun $1,6. Montante ida ne’e reflete redusaun 18%, ekivale ba millaun $360 kompara ho OJE tinan 2023. Tetu agregadu biliaun $1,6 inklui dotasaun ida hosi $1.458.292.345 ba administrasaun sentrál, $81.707.655 ba seguransa sosiál no $60.000.000 destina ba rejiaun administrativa espesiál Oekuse Ambenu. Valór ida ne’e la inklui fundu rezerva seguransa sosiál nian ho montante $162.007.651.

Ho valór OJE tinan 2024 nian parsela hosi $400.276.781, sei aloka ba saláriu no vensimentu hodi reprezenta ba redusaun hosi 14% iha relasaun ho tinan 2023. Ho valór $254.767.075 ba beins no servisu, hodi reflete diminuisaun hosi 36% kompara ho OJE tinan 2023. Ba despeza kapitál menór prevee ho montante $247.320, enkuantu ba kapitál dezenvolvimentu milloins $177.606.384, ne’ebé koresponde ba redusaun hosi 14% no 23%. Ikus liu prevee dotasaun $767.102.440 ba transferénsia públika, ne’ebé maka reprezenta redusaun ida hosi 13% kompara ho OJE tinan 2023.

Entidade públika sei finaliza sira-nia proposta orsamentu, hodi bele analiza hosi komité revizaun orsamentál iha loron 23 fulan Outbru to’o loron sia Novembru tinan 2023. Prevee katak projetu proposta lei OJE tinan 2024 bele aprova hosi KM to’o loron 14 fulan Novembru tinan 2023 no sei entrega ba parlamentu nasionál to’o loron 24 fulan Novembru tinan 2023.