Manufahi, 11 Outubru 2021: Xefe aldeia Uma-Luli, Alfredo Prego, informa katak komunidade sira ne’ebé buka moris liuhosi fila-liman no mós funsionáriu sira iha aldeia Uma-Luli, suku Babulu, postu-administrativu Same, tau hamutuk osan hodi halo rasik ponte ida ne’ebé kotu iha aldeia refere.

“Ami halo kuaze atu hotu ona maibé tuir kbiit ami komunidade ninian, ami mak sosa rai-henek, simente, no lalin fatuk, ami hodi halo maibé sei kontinua to’o hotu. Kona-ba orsamentu ne’e ami halo kontribuisaun hosi funsionáriu sira mak halo kontribuisaun, ami husu kontribuisaun hosi funsionáriu no hosi ema sira buka moris ne’e. Ami sei kontinua halo to’o hotu atu kleur ka lalais, no ba komunidade sira ami husu ajuda servisu,” Xefe aldeia Alfredo informa ba jornalista Timor News, ohin (11/10), via telefone.

Nia akresenta katak komunidade sira ho inisiativa hodi halo rasik ponte ne’e tanba sira hakarak asesu ba dalan ho transporte ne’ebé bele ba-mai ho di’ak maibé ponte ne’e monu tiha entaun impede sira-nia viajen hodi hala’o atividade loro-loron.

“Liuhosi ita-boot sira (TimorNews) entaun ami husu hato’o hela ba Governu katak ajuda tau-matan mai ami tanba parte Governu nian balu mai iha ne’e ami fó hatene ona maibé sira la fó atensaun ida. Ho ita-boot sira-nia mídia ne’e ami hakarak husu ajuda mak ne’e, Governu haruka tán besi mai no simente uitoan para ami bele hodi sor tiha ida ne’e halo di’ak to’o hotu lalais,” Xefe aldeia ne'e husu.

Iha ponte rua ne’ebé presiza hadi’a iha aldeia refere, maibé ponte ida seluk fali ne’e Alfredo husu Governu tenke fó apoiu tanba sei gasta orsamentu boot.

“Ida sorin ne’e mai mak ne’e, presiza orsamentu duni tanba ne’e sé karik liuhosi ita-boot sira entaun ita-boot sira bele hatutan hela ba (Governu),” nia dehan.