Dili, 30 Maiu 2022- Enfermeiru jerál, Rafael Barreto, hateten ba jornalista Timor News nian katak, kondisaun Postu Saúde Suku Dare nian ne’ebé mak komesa aat ona fó impaktu ba pesoál saúde sira ne’ebé mak servisu iha ne’ebá inklui pasiente sira ne’ebé mak mai halo tratamentu iha postu saúde refere.  

“Postu Saúde nia haris fatin komesa aat ba dadaun, didin lolon sira komesa nakfera ona, plafón sira dodok hotu ona, ne’e fó impaktu ba pesoál saude no fó mós impaktu ba ema moras sira ne’ebé mai halo tratamentu, tanba manu-fu’ik mak sa’e ba tolun iha plafon leten ne’e foer hira mak la tun mai iha ne’e, ne’e fó impaktu ba ema moras no aumenta moras tán”.

Rafael hatutan katak problema sira ne’e hato’o ona ba iha parte kompetente, maibé to’o agora seidauk iha nia resposta.

Tuir Rafael, kada loron pasiente ne’ebé mai halo tratamentu iha Postu Saúde refere iha 20 ba leten no moras ne’ebe rezista a’as liu mak ispa, moras kulit no diarea.

Total pesoál saúde ne’e mak servisu iha Postu Saúde refere hamutuk na’in hitu kompostu hosi doutora ida, parteira ida, pesoál saúde públika ida, farmasista ida, enfermeiru ida no empregada limpeza nian ida.