Dili, 22 Abril 2022 – Kandidatu ho númeru sorteiu 2 iha eleisaun prezidensiál 2022, Francisco Guterres Lú Olo, hateten katak nia simu rezultadu eleisaun ho hakmatek tanba povu rasik mak hili, no nia mós fó parabéns ba kandidatu ho númeru sorteiu 1, José Ramos-Horta, ne’ebé hetan vitória bazeia ba rezultadu apuramentu finál provizóriu hosi STAE.

“Ida ne’e mak vontade povu nian ne’ebé expresa liuhosi buletin votu direitu, polítiku no demokrátiku ida ne’ebé garante hosi konstituisaun repúblika. Ha’u simu rezultadu eleisaun segunda ronda ho laran hakmatek no haksolok tanba povu rasik mak hili ninia Prezidente Repúblika ba tinan 5 tuir mai. Parabéns ba Dr. José Ramos-Horta, Prezidente eleitu ba mandate 2022-2027,” Lú Olo deklara,  ohin (22/4), iha salaun Luz Clarita, Dili.

Lú Olo mós dehan, nia fiar katak José Ramos-Horta sei koopera di’ak ho parte hotu-hotu liuliu órgaun soberanu sira seluk hodi kontinua dezenvolve Timor-Leste.

“Ha’u fiar katak ita-boot sei koopera ho Parlamentu Nasionál, ho VIII Governu Konstitusionál no Tribunál Rekursu atu hatutan konkista sira ne’ebé ita hetan ona iha tinan lima. Parabéns mós ba povu Timor-Leste tomak,” nia dehan.