Dili, 16 Abril 2021 – Ministru Edukasaun Juventude no Desportu (MEJD) Armindo Maia informa katak iha eskola hamutuk 27 mak hetan estragus iha Timor-Leste, kauza hosi dezastre naturál inundasaun ne’ebé akontese iha 04 Abril liubá.
MEJD relata ida ne’e wainhira partisipa iha programa live TVE ho Sekretaria Estadu ba Komunikasaun Sosiál (SEKOMS) ohin (16/4) iha Palásiu Governu, Dili, no nia akresenta katak hosi totál refere, iha eskola 16 mak hetan estragus grave no 11 mak hetan estragus kamaan.
Governante ne’e salienta mós katak dezastre naturál ne’ebé akontese foin lalais ne’e afeta mós ba atividade edukasaun nian, maibé oras ne’e funsiona hikas ona, no estudante sira kontinua partisipa iha estudu liuhosi programa Eskola ba Uma no Online durante pandemia Covid-19, nune’e, nia husu estudante nia inan-aman sira atu suporta servisu edukasaun nian durante pandemia Covid-19.
Fonte: Mídia Secretário de Estado Para a Comunicação Social (SECOMS)