Kovalima, 01 Outubru 2021 – Ministru Obras Públika (MOP) Salvador dos Reis Pires hala’o kampaña vasinasaun kontra Covid-19, iha sexta (01/10) ne’e, iha suku Lepo, postu-administrativu Zumalai, munisípiu Kovalima, no esplika ba komunidade sira iha postu-administrativu refere katak informasaun ne’ebé espalla iha públiku katak foinsa’e ne’ebé simu vasina kontra Covid-19 sei la hetan oan no sei moris tinan rua de’it ne’e la loos ka hoax.
“Iha mós informasaun falsu seluk ne'ebé espalla iha públiku katak joven sira ne'ebé vasina sei laiha oan no balu dehan vasina moris tinan rua de'it, ne'e bosok, la loos tanba vasina ida, wainhira Governu ida hakarak uza, hola para fó vasinasaun ba komunidade tenke hetan aprovasaun husi Organizasaun Mundiál Saúde (OMS) nian katak vasina ne'e seguru. Klaru katak depois vasina dalaruma liman hetan moras, isin-manas, malirin, dalaruma diária ne'e nia efeitu husi vasina ne'e maibé ita-nia ekipa saúde sei fó ai-moruk Parasetamol hodi hatùn efeitu hosi vasinasaun ne'e, depois vasina ne'e Governu fó gratuita, la selu buat ida,” dehan Ministru.
Nia hatutan, Governu hanesan aman ka inan ba povu, nune’e, laiha inan-aman ida mak hanoin aat ba nia oan. Governu halo kampaña vasinasaun tanba hadomi no atu salva nia povu.
“Governu ne'e hanesan aman ka inan ba povu tanba ne'e laiha inan-aman ida mak hanoin aat ba nia oan maibé hanoin liu ba oan sira-nia di'ak,” dehan Ministru ne’e.
Fonte: Mídia Ministério das Obras Públicas (MOP)