Dili, 24 Maiu 2021 – Polísia Nasionál Timor-Leste (PNTL) liuhosi Komandante Komandu Operasaun Superintendente Xefe Pedro Belo hateten katak públiku haree liu ba membru PNTL nia agresaun fíziku ne’ebé halo ba vendedór nuu Octavio Thal iha domingu (23/5) ne’e iha Tasi-Tolu, maibé la haree ba kauza loloos hosi kazu refere.
“Ita labele haree ba atuasaun ne’ebé polísia halo, maibé ita presiza haree mós ninia kauza hosi akontesimentu ida ne’e […] atuasaun ikus ne’ebé polísia halo, ida ne’e mak sai kestaun ba públiku no ema hotu nia matan,” dehan Pedro Belo liuhosi konferénsia imprensa ne’ebé realiza ohin (24/5) iha Kaikoli, Dili.
Pedro Belo esplika, kazu ne’e akontese tanba membru PNTL sira esplika regra Estadu Emerjénsia (EE) maibé vendedór ne’e la halo tuir enkuantu vendedór ne’e kontra regra hodi ultrapasa hosi munisípiu ida ba munisípiu seluk iha tempu EE.
“Mosu diskusaun uitoan entre membru polísia sira ne’ebé destaka iha postu ne’ebá ho negosiante (vendedór) ne’e, hafoin ida ne’e polísia mós hatún negosiante ne’e ninia sasán (nuu) ba rai tanba negosiante ne’e soe nuu ba rai no kona kedas membru PNTL ida nia ulun […] Hosi ida ne’e mak ema hotu bele akompaña tanba nia (membru PNTL ne’e) sente moras, nia tenta foti nuu tuda fali negosiante ne’e maibé la konsege,” Pedro Belo akresenta.
Fonte: Mídia Polícia Nacional de Timor-Leste (PNTL)