Dili, 05 Agostu 2021: Primeiru-Ministru (PM) Taur Matan Ruak enkoraja populasaun iha munisípiu Ermera atu simu vasina kontra Covid-19 tanba númeru populasaun ne’ebé simu ona vasina iha munisípiu refere foin atinje 12% no ki’ik liu kompara ho munisípiu sira seluk dezde kampañia vasinasaun hahú hosi fulan Abríl liubá.

“Governu husu, no ha’u pesoalmente husu inan-aman sira tenke partisipa iha kampaña vasinasaun, tanba  Ermera munisípiu ida hetan vasina ki’ik liu, 12% de’it. Pur ezemplu hanesan Vikeke segundu lugár tuir Dili, entaun ha’u enkoraja sira dalan di’ak liu ita atu kombate moras ne’e mak simu vasina no ita sei iha vasina sufisiente para fó ba ita-nia sidadaun sira tanba ne’e ha’u enkoraja sira para simu vasina,” PM informa iha Palásiu Prezidensiál, Dili, iha kinta (05/8) ne’e, hafoin hasoru malu ho Prezidente Repúblika Francisco Guterres Lú Olo.

Kona-ba medida serka sanitária no konfinamentu domisiliáriu iha postu-administrativu rua munisípiu Ermera nian, Xefe Governu esplika, Governu toma hela atensaun ba situasaun ne’e, atu oinsá buka posibilidade, tanba Ermera hanesan munisípiu produtór kafé, nune’e, nia sujere katak dalan di’ak liu mak populasaun sira tenke simu vasina atu iha flexibilidade ba regra.