Baukau, 04 Novembru 2021: Primeiru-Ministru (PM) Taur Matan Ruak fó sasin katak Bispu Dioseze Baukauk, Dom Basílio do Nascimento, ne’ebé husik ona mundu, nu’udar protagonista ezemplár Igreja Katólika nian ba luta ba libertasaun nasionál.

“Destinu ho istória hili Dom Basílio do Nascimento hanesan protagonista exemplár hosi Igreja Katólika ba luta ba libertasaun nasionál. Matenek no hatene utiliza nia podér hanesan Vigáriu, Administradór Apostóliku, nune’e mós hanesan Bispu Septimúnsia, hodi influensia dalan ba akontesimentu sira, iha períodu ida difísil iha ita-nia história, ne’ebé mosu iha momentu antes Konsulta Populár ne’ebé hala’o referendu ba ukun rasik-an ba ita-nia rain doben Timor Lorosa’e,” Xefe Governu hateten wainhira partisipa iha serimónia haloot Bispu Dioseze Baukau, Saudozu Dom Basílio do Nascimento iha Katedrál Baukau, ohin (04/11), iha Munisípiu Baukau.

Taur dehan tán, “ha’u lembra, dezde ke nia mai Timor-Leste nia nunka lakon halo esforsu atu hasoru Frente Armada, tentativa iha 1994, la konsege, iha 1995 hasoru malu ho Komandante Daitula, lori hosi eis Deputadu Abeto Espírito Santo iha motor ida hodi hasoru malu, hodi ko’alia kona-ba nia kandidatura ba Bispu no mós situasaun Baukau nian”.

Taur konsidera saudozu Dom Basílio do Nascimento reprezenta no simboliza espíritu no vontade timoroan sira nian hodi luta ba buat ne’ebé la loos.

Dom Basílio do Nascimento hakotu-iis iha sábadu (30/10) liubá iha HNGV, Dili, tanba hetan moras atakasaun fuan. Molok ne’e nia hetan avakuasaun hosi Suai, Kovalima, ba HNGV, Dili, hodi halo tratamentu.