Dili, 08 Outubru 2021 – Prezidente Repúblika (PR) Francisco Guterres Lú Olo, ohin (08/10), fó posse ba Embaixadór Timor-Leste na’in lima ba nasaun lima mak hanesan; ba Reinu Tailándia mak Juvêncio de Jesus Martins: ba Reino Béljika mak Jorge Trindade Neves de Camões: ba Repúblika Indonézia mak Filomeno Aleixo da Cruz: ba Repúblika Mozambike mak Francisco Miranda Branco; no ba Malázia mak Joana Veneranda Amaral.
Iha diskursu, PR hateten katak asaun diplomátika iha rai-li’ur tenke koresponde ho nesesidade interna nasaun ninian.
“Asaun diplomátika, dezenvolve iha país ida-idak, tenke koresponde ho nesesidade interna ita-nia país. País investe iha diplomasia fatia ida razoável hosi Orsamentu Jerál Estadu. No sai óbviu katak ida ne’e ezije autór sira diplomata, fó énfaze ba Embaixadór sira atu kumpri sira-nia misaun,” Prezidente Repúblika hateten iha ninia diskursu, ohin, iha Palásiu Prezidensiál, Dili.
PR fiar katak, ho orientasaun hosi Ministériu Negósiu Estranjeiru, Embaixadór sira sei esplora oportunidade iha nasaun ida-idak hodi fó benefísiu ba Timor-Leste.
Fonte: Mídia Presidente da Repúblika (PR)