Dili, 20 Abril 2022: Primeiru-Ministru, Taur Matan Ruak, hateten katak oras ne’e Ministériu Administrasaun Estatál (MAE) halo hela preparasaun ba serimónia fó pose ba José Ramos-Horta nu’udar Prezidente Repúblika Timor-Leste ba períodu 2022-2027.
“Ami ko’alia asuntu tolu (inklui), Preparativu ba tomada pose ba Prezidente eleitu. […] Preparasaun la’o hela Ministériu Estatál (MAE) mak halo iha Tasi-Tolu, espera katak preparative sira la’o di’ak para ke to’o loron tomada pose bele akontese. Governu halo esforsu hotu para ida ne’e bele akontese,” Primeiru-Ministru informa ida ne’e, ohin (20/4), hafoin hasoru malu ho Prezidente Repúblika, Francisco Guterres Lú Olo, iha Palásiu Prezidensiál, Dili.
Primeiru-Ministru mós hato’o ninia kongratulasaun ba José Ramos-Horta tanba hetan votu maioria hosi eleitór sira hodi sai nu’udar Prezidente Repúblika ba períodu 2022-2027.
“Ha’u aproveita kongratula kandidatu eleitu Dr. José Ramos-Horta,” nia dehan.
Fonte: Timor News