Manufahi, 20 Janeiru 2022 - Responsavel médiku vijilánsia epidemiolójika munisípiu Manufahi Doutór Aquino Marques Sarmento informa, ohin (20/01) ne’e katak, Sentru Saúde Internamentu munisípiu Manufahi rejistu kazu dénge 19 iha inísiu fulan janeiru tinan 2022, maioria labarik idade menus husi tinan 15 mai kraik.
Doutór Aquino esplika, kazu denge 19 ne’e deteta iha fulan janeiru nia laran hahú husi loron 01/01 to’o 20/01, hosi totál pasiente na’in-19 ne’ebé baixa iha sentru saúde Internamentu Same, pasiente na’in-5 mak transfere ba ospitál Referál Maubisi tanba grave, hosi totál pasiente ne’ebé halo tratamentu iha sentru Saúde Internamentu Same, maioria rekupera no fila ona ba uma no agora dadaun hela na’in-2 mak sei baixa hela iha fatin refere.
Nia salienta tan katak saúde Manufahi rejistu kazu denge iha semana datoluk fulan janeiru tinan 2022 aas liu kompara ho tinan 2021 hahú hosi fulan janeiru to'o dezembru rejistu de’it kazu 20, no husi totál kazu ne’e pasiente na’in-1 mak mate.
Enkuantu atu prévene moras denge iha Manufahi parte saúde ambientál halo ona prevensaun, hodi halo fogin iha fatin ne’ebé risku ba denge iha suku Babulo no suku Letefoho postu administrativu Same, tanba suku 2 ne’e iha vila laran ne’ebé kada tinan sempre identifika pasiente denge.
Fonte: Diáriu "Roman ba Sosiedade" Manufahi