Mianmar, 19 Outubru 2021 – Soldadu junta militár Mianmar kuaze na’in-50 resin mate iha konfrontu kontra milísia lokál anti-golpe ne’ebé akontese iha Mandalay, Sagaing, Yangon no Kayah, entre 13 no 15 Outubru liubá.

CNN informa ohin (19/10) katak, insurjénsia guerilleira ne’ebé Forsa Defeza Povu (sigla inglés PDF) halo iha kantu hotu-hotu iha Mianmar kontinua akontese, espesialmente akontese dezde Governu ba Unidade Nasionál (sigla inglés NUG) deklara funu kontra junta militár ne’ebé halo golpe militár iha nasaun refere.

Iha sexta (15/10) liubá milísia anti-golpe iha distritu Shwe Bo, iha Sagaing, afirma katak sira ataka no oho soldadu junta militár na’in-12.

Mídia lokál Irrawaddy relata mós katak, soldade junta militár na’in-8 mós mate iha sidade Khin-U iha karta (13/10) liubá wainhira kareta militár rua hetan atake iha suku Myakan. Soldadu junta militár na’in-10 seluk mós mate iha kinta (14/10) tanba tama ho kareta ba lasu bomba iha dalan iha sidade Myaung, rejiaun Sagaing.

Iha mós ema na’in-8.981 ne’ebé hetan kapturasaun hodi detéin tanba kontra rejime junta militár Mianmar.