Portugál, 02 Outubru 2023 - Ministra Solidariedade Sosiál no Inkluzaun (MSSI), Verónica das Dores ho Ministra Traballu Solidariedade Seguransa Sosiál (MTSSS) Portugál, Ana Mendes Godinho, asina tiha ona akordu administrativu ba aplikasaun konvensaun seguransa sosiál entre Timor-Leste ho Portugal, inklui asina Memorandu Entendimentu kona-ba mobilidade traballadór Timoroan sira hosi Sekretáriu Estadu Formasaun Profisionál no Empregu (SEFOPE), Rogério Araújo Mendonça. Asinatura refere hala'o iha Segunda (02/10)  iha edifísiu MTSSS, Prasa Londres Lisboa, Portugál.

Iha biban ne’e MSSI Verónica das Dores hateten katak, liuhosi akordu administrativu ba aplikasaun konvensaun seguransa sosiál ne’ebé foin asina daudaun ne’e, importante tebes atu asegura tratamentu ne’ebé hanesan ba sidadaun Timor-Leste no Portugál nian. Konvensaun ne’e mós atu bele aplika efetivamente, hodi regula aspetu konkretu balu, liuliu termu komunikasaun entre sistema seguransa sosiál hodi asegura, garante direitu laborál no protesaun sosiál traballadór rai rua ne’e nian ho dignu. Konvensaun ida ne’e abranje ba traballadór sidadaun nasionál Timor-Leste no Portugál nian no iha objetivu duplu, signifika katak karreira kontributiva traballadór nasaun rua nian, nafatin iha konsiderasaun ba períodu kontributivu rua, independentemente hosi traballadór sira ne’ebé husik hela nasaun estranjeiru, iha ne’ebé sira hala’o servisu ba no filafali ba sira-nia nasaun orijen.