Aileu, 15 Juñu 2021 – Ministru ba Asuntu Parlamentár no Komunikasaun Sosiál (MAPKOMS) Francisco Pereira Jerónimo, iha tersa (15/6) ne’e, lansa ofisialmente vasinasaun kontra Covid-19 ho vasina AstraZeneca doze daruak iha munisípiu Aileu.
Iha lansamentu, Ministru ne’e hateten, vasinasaun Covid-19 ne’e importante atu prevene propagasaun virus mortál ne’e iha komunidade nia leet.
Ministru Francisco mós dehan, Governu sei la obriga populasaun ne’ebé lakohi simu vasina, maibé sei nafatin submete ba Swab test wainhira atu halo sirkulasaun.
Enkuantu vasina AstraZeneca doze daruak iha Aileu ne’e sei fó uluk prioridade ba ferik no katuas sira ho idade tinan 60 ba leten no sira ne’ebé iha moras komobilidade tanba parte hirak ne’e mak iha risku boot ba infesaun virus corona, maibé vasinasaun tuir mai sei fó ba ema hotu-hotu.
Fonte: Mídia Ministério dos Assuntos Parlamentares e Comunicação Social (MAPCOMS)