Manufahi, 09 Fevereiru 2022 - Ekipa tékniku Aeroportu no Navegasaun Aérea Timor-Leste, Empréza Públika (ANATL E.P), ho autoridade munisípiu Manufahi, ohin (09/02) ne’e, hala’o side survei iha kampu aviasaun Ladiki-Same, munisípiu Manufahi, atu halo konstrusaun mini aeroportu rejionál iha Ladiki.

Diretóra Unidade Estúdu Planeamentu no Infrastrutura ANATL E.P, Antónia T . Cortereál de Oliveira hatete katak, side survei ne’e bazeia ba polítika VIII Governu nian ne’ebé prevé ona orsamentu liuhosi Orsamentu Jerál Estadu (OJE) 2022 nian ne’ebé aprovadu iha Parlamentu Nasionál (PN), hodi dezenvolve aerodromu  rejionál sira iha munisípiu Manufahi, Bobonaro, Viqueque, Lautem no Ataúro, hodi responde ba preokupasaun emerjénsia sira hanesan evakuasaun médikas, atende servisu Governamentál nian, aspetu seguransa inklui aspetu turizmu nian.

Diretóra ne’e salienta tan katak, survei ba fatin refere atu rekolla informasaun báziku husi autoridade no lideransa komunitária sira, hodi prepara konseitu ba projetu nian hodi determina termu referénsia ba konsultór ne'ebé  sei hala'o estudu viabilidade, no liuhosi estudu viabilidade mak sei determina rezultadu  orsamentu ba konstrusaun refere.