Ainaru, 29 Setembru 2021 – Aldeia Lesu iha suku Foho Ai-Liku, postu-administrativu Hatu-Udu, munisípiu Ainaru, ho uma-kain 171 no populasaun 800 resin, preokupa ona ho bee-moos dezde tempu Indonézia to’o agora, tanba ne'e sira husu ba Governu atu dada bee-moos ba sira wainhira osan iha.

Preokupasaun ida ne’e populasaun sira hato’o ba Governu liuhosi Xefe aldeia Lesu Alcino Amaral ne’ebé hatutan hikas ba jornalista Timor News ohin (29/9) via telefone. Alcino dehan katak ninia populasaun sira iha aldeia refere ba kuru bee-moos iha fatin ida de’it ne’ebé dook tebes no presiza lori transporte ka kuda hodi lalin.

“Bee iha ne’e durante hosi okupasaun Indonézia to’o agora ne’e ami konsumu de’it bee-moos hosi fatin ida de’it. Fatin ne’e ho distánsia ne’ebé mak ami ba ne’e dook la halimar. Kuandu tempu udan mai ami sente di’ak maibé kuandu tempu bai-loro mai ne’e susar ba ami tanba uza kuda, uza grobak, sé iha motor bele uza lori ba lalin bee ne’e. Kuandu nia maran ne’e ami sosa bee iha tanke ho osan $30 ami sosa de’it iha tanke hodi mai ense ba fatin ne’ebé mak ami prepara tiha ona. Ema ne’ebé kbiit iha mak bele sosa, ema ne’ebé kbiit laiha nia labele sosa. Nia tenke berusaha máximu para ba lalin hosi fatin ne’ebé mak bee iha ne’e,” Xefe aldeia ne’e informa.

Nia dehan katak iha fulan Marsu liubá PNDS halo tiha perfurasaun maibé la hatene tanba saida mak rezultadu laiha.

“Sira dehan ha’u husu hela sé karik ba oin Governu iha osan uitoan karik dada bee ne’e mai, dada netik bee ne’e ba. Iha tinan kotuk ne’e ami hatama tiha proposta ida (kona-ba bee-moos), proposta ne’e tama tiha ba númeru 1, agora ba fali 2021 ne’e la hatene proposta númeru 1 ne’e mak to’o agora lakon tiha de’it to’o agora la mosu tiha,” Alcino dehan.