Dili, 08 Jullu 2021 – Atleta Natasaun Imelda Belo ho José da Silva sei reprezenta Timor-Leste hosi partisipa iha kompetisaun Natasaun iha Tokyo Olimpic Games 2020 (2021) ne’ebé sei realiza iha Japaun hahú hosi 23 Jullu to’o 08 Agostu 2021.
“Ba kolega na’in-2 Imelda ho José ha’u dala ida ko’alia ona ho ita-boot sira, Jogu Olímpiku (Olympic Games) hanesan jogu ida boot liu iha mundu tomak […]. Tanba ne’e mak Governu iha difikuldade oioin maibé buka atu iha netik reprezentasaun ida ne’ebé bele lori Timor-Leste nia partisipasaun iha Jogu Olímpiku tanba ida ne’e mak interese Governu no Estadu ninian. Ho nune’e interese ida ne’e tula ba ita-boot na’in-2 Imelda ho José nia kabaas,” dehan Sekretáriu Estadu Juventude no Desportu (SEJD) Abrão Saldanha iha vídiu-informativu ofisiál divulga ohin (08/7) ne’ebé Timor News asesu.
Abrão akresenta mensajen ba sira na’in-2 katak manán ka lakon ne’e opsaun daruak, maibé importante atu hatudu Timor-Leste nia imajen di’ak liu hodi impresiona ema seluk kona-ba Timor-Leste nia kultura no moris nu’udar povu ida iha mundu.
Fonte: Mídia Secretaria de Estado da Juventude e do Desporto (SEJD)