Dili, 11 Maiu 2021 – Diretór Ezekutivu Centro Nacional Chega (CNC) Hugo Maria Fernandes ho ekipa hasoru malu ho Diretora Ezekutiva Fundu Dezenvolvimentu Kapitál Umanu (sigla portugés FDCH) Leila Cárceres dos Santos ohin (11/5) iha nia Gabinete, Dili, hodi husu atu FDCH fasilita ka enkaixa mós vítima sobrevivente pasadu sira-nia oan ba iha programa bolsu estudu Hakbiit ne’ebé ohin loron FDCH atribui ba família kbiit-laek sira-nia oan hodi asesu ba Ensinu Superiór iha rai-laran.
Diretór Ezekutivu CNC mós haktuir, kada tinan CNC rejista númeru vítima sobrevivente pasadu ne’ebé ho kondisaun vulverável kuaze rihun ualu (8.000), nune’e parte CNC hakarak koopera ho FDCH hodi haree atu fasilita bolsu estudu Hakbiit ba sobrevivente sira-nia oan.
Hatán ba ida ne’e, Diretora Ezekutiva FDCH hateten, FDCH nakloke ba kooperasaun ho instituisaun hotu-hotu, liuliu ho CNC kona-ba bolsu estudu ba sobrevivente pasadu sira-nia oan.
Tanba ne’e, Diretora Leila akresenta, nia parte sei hato’o hikas ba Prezidente Konsellu Administrasaun FDCH, maibé nia mós husu ba CNC atu halo proposta formál ida hodi dirije ba Prezidente Konsellu Administrasaun FDCH atu bele diskute iha enkontru Konsellu Administrasaun nian hodi aprova molok implementa.
Iha sorumutuk ne’e, Diretór Ezekutivu CNC mós entrega dokumentu hanesan livru istóriku ne’ebé CNC prodúz hodi konserva memória pasadu ba Diretora Ezekutiva FDCH.
Fonte: Fundo de Dezenvolvimentu do Capital Humano (FDCH)