Dili, 05 Setembru 2021 – Ministériu Saúde ohin (05/9) relata totál númeru kazu infetadu Covid-19 foun hamutuk 150 ne’ebé inklui 18 deteta iha Ataúru, enkuantu kazu mate ka óbitu foun iha 2 ne’ebé kompostu hosi na’in-1 iha Baukau no na’in-1 seluk iha Dili.
“Númeru kazu detetadu foun aumenta, kompara ho hori-sehik (04/9). Kazu detatadu foun 18 iha Ataúru. [...] Númeru óbitu na’in-2. Ida iha Dili, ida iha Baukau. [...] (total) kazu foun relata ohin 150,” deskreve iha komunikadu imprensa ofisiál hosi parte saúde.
Totál númeru 150 ne’e kompostu hosi na’in-96 deteta iha Dili, na’in-30 iha Baukau, na’in-14 iha Kovalima, no iha munisípiu seluk na’in-10.
Númeru kazu mate 2 ne’e na’in-1 bebé ho sexu mane, idade fulan 10, timoroan, inan-aman hela iha Baukau, iis kotu hori-sehik tuku 17:30 iha Baukau. Na’in-1 seluk ho sexu mane, idade tinan 58, sidadaun estranjeiru, hela iha Aileu, vasina kompletu no hakotu iis iha Lahane ohin tuku 14:55.
Pasiente rekuperadu ne’ebé Ministériu Saúde relata ohin iha na’in-225, nune’e kazu ativu iha na’in-4.184 no totál númeru óbitu ne’ebé Timor-Leste rejista ona hamutuk 80.
Fonte: Mídia Palácio das Cinzas