Ermera, 05 Agostu 2021 – Pasiente pozitivu Covid-19 iha munisípiu Ermera ne’ebé ativu hela iha loron ohin (05/8) hamutuk na’in-616 sura ho kazu foun na’in-22 ne’ebé deteta tán ohin iha munisípiu refere, no númeru kazu ne'e aas liu munisípiu Díli ne’ebé ho totál kazu ativu iha loron ohin hamutuk na’in-311 no aas liu mós munisípiu seluk, tuir tabela informativu ne’ebé Timor News asesu hosi Ministériu Saúde.
Komunikadu imprensa hosi Ministériu Saúde haktuir ohin katak, kazu ativu na’in-311 iha Díli ne’e sura ho kazu foun ne’ebé deteta mós ohin iha Dili hamutuk na’in-31.
Enkuantu totál kazu foun ne’ebé deteta ohin iha Timor-Leste hamutuk na’in-80, ne’ebé kompostu hosi Ermera no Díli nian ne’ebé mensiona ona no na’in-22 deteta iha munisípiu seluk.
“Kazu detetadu foun ohin mane na’in-41, feto na’in-39. Kazu detetadu foun ohin, kazu 8 ka 10% mak sintomátiku,” Ministériu Saúde informa.
Iha mós pasiente rekuperadu foun hamutuk na’in-14 ne’ebé Ministériu Saúde relata, nune’e pasiente Covid-19 ne’ebé oras ne’e baixa hela iha Timor-Leste hamutuk na’in-1.160.
Timor-Leste mós rejista ona óbitu Covid-19 hamutuk ema na’in-26 dezde mosu pandemia iha Marsu 2020 liubá.
Fonte: Mídia Palácio das Cinzas