Dili, 09 Fevereiru 2022- Diretór Ensinu Báziku Sentrál (sigla portugés, EBC) 30 de Agosto, Dili, Filomeno Salsinha informa katak, profesór ba lian portugés menus, ho nune’e servisu iha eskola refere ladún efetivu.
Diretór hato’o preokupasaun hirak ne’e, wainhira hetan entrevista hosi jornalista Timor News ohin (09/02) iha nia knaar fatin Dili, relasiona ho númeru estudante iha eskola refere boot no profesór menus, liuliu professor iha lian portugés.
“Sim ha’u-nia preokupasaun mak se bele karik, aumenta tan profesór liuliu ba área sira importante hanesan ohin ha'u dehan ne’e atu bele kompleta tan vaga sira ne'ebé iha ne’e mamuk hela, liuliu portugés,” Filomeno akresenta.
Nia mós hateten katak, alein hosi ne’e, profesór balu mós idade avansadu ona, ho nune’e nia husu ba parte kompetente, liuliu Ministériu Edukasaun Juventude no Desportu (MEJD), tenke hare ba preokupasaun hirak ne’e.
Totál estudante Ensinu Báziku Sentrál 30 Agostu, hamutuk 2.200, enkuantu profesór permanente na’in 52, kontratadu na’in 8 no voluntáriu na’in 4.
Fonte: Timor News