Dili, 04 Abril 2022 – Ekipa servisu kunjunta hosi Servisu Migrasaun, IGT, Tributária, PNSIK no AIFAESA, hala'o atividade operasaun konjunta hodi kaptura sidadaun estranjeiru na’in-37 iha área Fatuhada no Hudi Laran, Dili, tanba uza vistu turista hodi halo atividade komersiál.

Komandante Setór Operasaun Servisu Migrasaun, Inspetór Polísia, Ernesto Maia, deklara katak sidadaun hirak ne’e kaptura liuhosi operasaun konjunta.

“Durante loron lima nia laran ita halo operasaun konjunta hamutuk ho IGT, Tributária, PNSIK, MTCI ne’ebé lidera hosi AIFAESA, tama sai fatin otelaria, karaoke no massage iha Dili laran hodi halo inspesaun ba sidadaun estranjeiru sira no konsege asegura sidadaun estrajeiru na’in-37 kompostu hosi feto 16, mane na’in-21 no ekipa konjunta lori sidadaun hirak ne’e ba edifísiu Migrasaun, Ministériu Interiór, Vila Verde hodi submete ba prosesu investigasaun,” relata Ernesto Maia, iha segunda (04/4) ne’e, iha nia knaar fatin Vila-Verde, Dili.

Nia dehan, inspesaun ne’e parte Migrasaun haree liu ba pasaporte no violasaun vistu, AIFAESA haree ba presu no data produtu enkuantu MTCI haree liu ba dokumentu lisensa kompañia hirak ne’ebé halo atividade komersiál.

“Sidadaun estranjeiru na’in-37 hosi Indonézia, Malázia no Kambodia, agora daudaun ita halo hela prosesu identifikasaun no iha na’in-5 mak seidauk mai aprezenta-an iha sede Migrasaun,” nia subliña.

Nia afirma, sidadaun estranjeiru sira ne’ebé viola lei sei aplika sansaun selu multa, maibé sira ne’ebé rekuza, nia parte sei submete lista naran sidadaun sira nian ba iha Ministériu Públiku atu prosesa tuir lei.

“Agora prosesu investigasaun la’o hela iha Servisu Migrasaun nian, ami halo identifikasaun hafoin de ida ne’e sei koordena ho Ministériu Públiku para bele hetan orientasaun tuir lei, karik iha indísiu forte ba prátika tráfiku umanu nian no krime seluk tán,” dehan nia.

Komandante Operasaun ne’e apela ba komunidade hotu-hotu atu halo kooperasaun di'ak ho autoridade seguransa karik deskonfia ema balu halo prátika tráfiku umanu nian bele informa lalais ba parte seguransa.