Manufahi, 04 Outubru 2021 – Governu liuhosi Ministru Administrasaun Estatál (MAE) Miguel Pereira, ohin (04/10), inaugura Uma Kbiit-Laek (UKL) tolu iha aldeia Urufú, suku Holarua, postu-administrativu Same, munisípiu Manufahi.
Iha serimónia inaugurasaun ne’e, MAE hateten, Governu garante direitu moris ema kbiit-laek sira nian iha Timor-Leste, tanba ne’e Governu aloka orsamentu millaun $21.209,169,15 hodi implementa programa UKL, no halo kontrusaun UKL ba benefisiáriu 1.254 iha suku 442 iha Timor-Leste, no kada uma ho kustu orsamentu $14.000,00 to’o $17.000,00.
MAE mós fó parabéns ba autoridade lideransa komunitária no ekipa téknika PNDS iha munisípiu Manufahi, tanba inaugurasaun ba UKL 3 iha suku Holarua ne’e hanesan inagurasaun dahuluk UKL iha Timor leste.
Fatin hanesan, Administradór Munisípiu Manufahi Arantes Isaac Sarmento relata, implementasaun programa PNDS iha Manufahi hetan progresu di’ak no fó duni benefísiu ba populasaun kbi’it-laek sira.
Benifisiária Lepoldina da Silva no Lorença da Costa hosi aldeia Urufú, suku Holarua, agradese ba Governu tanba halo ona uma ba ema kbiit-laek sira ne’ebé durante ne’e hela iha uma ho kondisaun ladún di’ak.
Fonte: Diáriu "Roman ba Sosiedade" Manufahi