Dili, 19 Maiu 2021 – Hafoin hasoru malu ho Prezidente Repúblika Francisco Guterres Lú Olo, ohin (19/5) iha Palásiu Prezidensiál Dili, Xefe Estadu Maiór Jenerál FALINTIL – Forsa Defeza Timor-Leste (F-FDTL) Tenente Jenerál Lere Anan Timur informa katak iha fulan Maiu (5/2021) nia laran sei hahú taka sai rezultadu naran kandidatu membru F-FDTL sira ne’ebé sei tuir prosesu selesaun ba oin hodi inkorpora ba instituisaun F-FDTL.
“Kona-ba rekrutamentu ne’e ha’u informa ona ba Prezidente Repúblika katak iha fulan ida ne’e ami komesa taka sai ona kandidatu sira-nia naran iha kada munisípiu ida-idak nian. Ha’u informa mós kona-ba kritéria rekrutamentu ninian, ami presiza ema 2.400, hosi 2.400 ne’e sei selesiona mak hetan 600 ba inkorporasaun hodi tama ba F-FDTL,” dehan Lere Anan Timur.
Nia esplika, kona-ba prosesu rekrutamentu ne’e fahe ba grupu tolu, dahuluk mak haree liu ba veteranu sira-nia oan, daruak mak joven sira sidadaun Timór no datoluk mak sira ne’ebé iha espesialidade téknika sira hanesan eletrisidade, mekánika, IT no seluk tán.
Fonte: Relação Pública F-FDTL