Dili, 16 Setembru 2022- Sekretária Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DEE), ohin (16/09), iha salaun sentru formasaun ETDA, Aimutin, realiza PDB (Pre-Departure Breafing) ba joven Timoroan nain lima-nulu-resin-hitu (57) ne’ebé atu ba servisu iha Australia iha tinan ida ne'e nia laran.
Iha biban ida ne’e, Diretór DNEE, Filomeno Soares, hateten katak realizasaun programa PDB ne’e ho objetivu atu fahe informasaun ba kandidatu traballadór sira ne’ebé atu ba servisu iha Austrália, hodi sira bele kompriende kona-ba kultura, disiplina servisu no lei balu Austrália nian.
Filomeno hatutan tán katak informasaun ne’ebé ekipa DNEE fahe ba kandidatu traballadór sira ne’e bazeia ba informasaun ne’ebé empregadór hosi Australia sira fó. Nune’e, husu ba kandidatu traballadór nain-57 ne’ebé hetan ona oportunidade atu aproveita ho didi’ak hodi aprende, nune’e ba servisu bele halo tuir informasaun ne’ebé sira hetan tiha ona.
Iha tempu hanesan, Filomeno mós apela ba kandidatu traballadór sira atu hatudu komportamentu ne’ebé di’ak, kumpri ema nia lei ne’ebé iha, no labele halai sees hosi sistema, tanba halai sees hosi sitema sei prezudika empregadór sira atu emprega tán joven Timoroan sira iha futuru.
Kandidatu traballadór sira kompostu hosi feto nain tolu-nulu-resin-ualu (38) no mane na’in sanulu-resin-sia (19). Sira ne'ebé sei ba servisu iha kompaña Madec perfection Berries hamutuk na’in-5, FPG Smart Berries nian-12, Adco Manggo na’in-4, no Adco West Hills na’in-19.
Fonte: Secretário Estado para Formação Profisional e Emprego (SEFOPE)