Dili, 15 Setembru 2021 – Konsellu Ministru (KM) realiza reuniaun ohin (15/9) iha Palásiu Governu, Dili, no delibera ona atu autoriza selebrasaun akordu finansiametu ida ho Banku Dezenvolvimentu Aziátiku (sigla inglés ADB), relasiona ho Projetu Espansaun Aeroportu Internasionál Prezidente Nicolau Lobato, Komoro, Dili.
KM fó podér tomak ba Ministru Finansa Rui Augusto Gomes hodi asina akordu ne’e. Projetu refere prevé nia estensaun ba pista aterajen, tore kontrolu foun ida no reabilitasaun ba instalasaun sira seluk.
Aléin hosi ne’e, iha ámbitu projetu espansaun Aeroportu Internasionál Prezidente Nicolau Lobato, KM mós delibera atu fó autorizasaun ba dezenvolvimentu projetu faze dahuluk nian, loke prosedimentu aprovizionamentu tolu, ho tipu konkursu públiku internasionál, ba adjudikasaun kontratu públiku ba kontratasaun empreza sira ba konsesaun no konstrusaun, ba fornesimentu servisu supervizaun no jestaun projetu nian.
Fonte: Mídia Ministério das Obras Públicas (MOP)