Dili, 08 Outubru 2021 – Diretór Nasionál Bombeiru Timor-Leste, Claudio da Silva, husu ba komunidade sira atu labele fó tán osan ba membru Bombeiru sira ne’ebé ba hala’o sira-nia devér hodi serví komunidade.
“Ami-nia servisu la husu atu komunidade selu ami tanba Estadu selu tiha ona ami. Ami prontu ba atu serví de’it, ami kumpri ami-nia misaun. Ami la hanesan instituisaun balu ne’ebé atu ba halo buat ruma komunidade tenke selu. Ami hatene katak ami-nia an ne’e Estadu selu ona fulan-fulan. […] Balu dehan katak ami ba tesi ai karik (komunidade) tenke selu ami, ami ba fornese bee karik (komunidade) tenke selu ami ne’e labele,” dehan Diretór Nasionál Bombeiru Timor-Leste, Claudio da Silva, ba jornalista Timor News, ohin (08/10) iha nia knaar-fatin, Kaikoli, Dili.
Tanba ne’e, nia dehan katak wainhira iha membru Bombeiru ruma mak husu atu komunidade selu sira, entaun tenke informa ba parte Diresaun Bombeiru nian hodi foti medida ruma.
“Sé iha membru ruma mak halo asaun sira hanesan ne’e, halo favór kontaktu mai iha diresaun para ami bele foti medida ruma,” Claudio dehan.
Fonte: Timor News