Dili, 29 Novembru 2021 – Vicente Mouzinho de Deus loro-loron hakbesik-an ba fatin públiku hodi tane liman ba ema atu bele hetan osan balu hodi sosa ai-hán iha sira-nia uma-laran, tanba ho kondisaun defisiénsia fíziku ne’ebé la permite atu nia buka servisu hanesan ema ho kondisaun normál sira.

Atividade tane liman loro-loron ne’e Vicente halo durante tinan 6 ona, maibé nia hateten katak parte Governu seidauk iha asaun ruma atu suporta nia moris.

“Tinan 6 ona. […] Ha’u túr iha ne’e husu, ema hanoin mak fó osan. Osan ne’e ba hola fali foos, modo, mina ita lori hán. […] Governu ne’e husu ba husu mós laiha, husu sira dehan ba hein. Ita hein ba hein to’o agora laiha,” Vicente dehan ba Timor News, ohin (29/11), iha Kolmera, Dili.

Ho ida ne’e, iha fatin hanesan, estudante universitáriu Maria da Costa, hato’o ninia perspetiva katak, Governu ko’alia mak barak de’it kona-ba dignifika defisiente sira-nia kondisaun moris maibé asaun konkretu menus tebes.

“Sira (líder) ko’alia mak barak, ho kareta la’o tún-sa’e hetan hela ema sira (defisiente) hanesan ne’e, dalaruma la preokupa liu. Iha área rurál sira ne’ebá defisiente barak maibé Governu la hanoin dehan ba buka tuir to’ok ba para oinsá apoia ka hadi’a sira-nia moris iha foho ne’ebá. Sira nian mak ko’alia, fahe informasaun, ko’alia, ko’alia barabarak, ida ne’e de’it. Asaun menus,” nia dehan.