Dili, 29 Setembru 2021 – Diretór Interinu Organizasaun Non-Governamentál Fundasaun Alola José Sabino Ximenes husu ba mane sira katak wainhira fó isin-rua ba feto sira tenke responsabiliza atu nune’e labele hamosu kazu soe bebé arbiru.

“Ba mane sira, wainhira kuandu hanoin atu fó isin-rua ba feto ida ne’e tenke iha responsabilidade, la’os hanoin dehan tanba nia gosta ha’u, hakarak ho hakarak para halo hanesan ne’e, maibé ikus fali laiha responsabilidade, no fim estraga bebé estraga labarik, ne’e konsekénsia bebé sei estraga. Ida (aktu soe bebé) ne’e krime no sira sei responsabiliza tuir prosesu legál,” Diretór Inferinu Fundasaun Alola informa ba jornalista Timor News, ohin (29/9) iha nia servisu fatin, Mascarinhas, Dili.

Diretór interinu ne’e husu mós ba feto sira atu labele soe bebé arbiru tanba iha fatin barak iha Timor-Leste ne’ebé simu hela bebé atu hakiak.

“Ema ida soe bebé dalaruma tanba bebé aumenta susar ba família, moe ba ninia família ka dalaruma mane laiha responsabilidade. Husu ba inan-feton sira liuliu ba foinsa’e sira labele soe bebé. Iha instituisaun bara-barak, hanesan Madre sira nian, entrega ba sira atu hakiak. […] Ita ema moris ona ita iha direitu atu moris, kuandu ita estraga ne’e ita kontra direitu ema nian maske nia bebé. Instituisaun bara-barak agora iha, bele entrega (bebé) ba iha ne’ebá, iha orfanatu sira hodi hakiak,” nia dehan.

Kazu soe bebé akontese mós dala rua iha períodu konfinamentu obrigatóriu ne’ebé Governu impoin iha Dili foin lalais ne’e, tuir José Sabino informa.

Fundasaun Alola hanesan organizasaun non-governamental ida ne’ebé hala’o ninia knaar atu promove feto no labarik sira-nia moris.