Filipina, 20 Setembru 2021 – Boxista Filipinu koñesidu Manny Pacquiao sei kandidata-an hodi sai nu’udar Prezidente Filipina iha tinan oin.
The Guardian haktuir, Pacquiao aseita nomeasaun hosi nia aliadu polítiku sira iha asembleia nasionál ne’ebé partidu PDP-Laban nia faksaun halo iha domingu (19/9) ne’e iha Filipina, ne’ebé lidera rasik hosi nia.
“Ha’u lutadór ida no ha’u sei kontinua sai nu’udar lutadór iha ring laran no li’ur. Ha’u aseita ita-boot sira-nia indikasaun katak ha’u nu’udar kandidatu ba Prezidente Repúblika Filipina,” dehan Pacquiao iha nia diskursu.
Iha fulan Jullu liubá Pacquiao eleitu nu’udar Líder PDP-Laban hafoin nia kritika tiha Prezidente atuál Filipina Rodrigo Duterte kona-ba Duterte nia luta kombate korupsaun.
Molok ne’e, iha fulan Agostu liubá, hafoin lakon kontra Yordenis Ugas iha nia jogu sa’e ring ba sintu WBA, iha Las Vegas, Estadus Unidus, Pacquiao mós afirma kedas katak tempu badak nia sei anunsia nia kandidatura ba Prezidente Repúblika iha 2022.
“Ha’u hatene ida ne’e nu’udar buat ida ne’ebé difísil liu duké boxing, maibé ha’u hakarak ajuda ema barak iha Filipina,” dehan Pacquiao iha momentu ne’ebá.
Fonte: The Guardian