Dili, 19 Setembru 2023 - Ministériu Edukasaun (ME) liuhosi Sekretáriu Estadu Ensinu Sekundáriu Jerál no Ensinu Tékniku Vokasionál (ESJESTV), Domingos Lopes Lemos, liuhosi komunikadu imprensa iha Tersa (19/09) hateten katak ministériu edukasaun la hapara profesór no profesora sira-nia kontratu, maibé sei halo esforsu hodi valoriza sira bazeia ba dekretu lei Nu. 31/2023, 31 Maiu, artigu 11 kona-ba ingresu espesiál, iha kategória profisionál ba sira ho grau C mak indivídu sira ne’ebé prienxe kondisaun kumulativu sira. Komunikadu imprensa ne realiza hodi hatán ba preokupasaun hosi profesór kontratadu hamutuk na'in rihun-ida-atus-haat-haatnulu-resin-sia (1.449) nian, kona-ba sira deside halo boikota dever hanorin no la fó ezame nasionál ba estudante sira iha loron 16 fulan Outubru tinan 2023 ne'e, relasiona ho deklarasaun hosi ministériu edukasaun deside hapara sira-nia kontratu.  

“Pontu dahuluk, serbisu ona nu’udar kontratadu hosi departamentu governamentál responsavél ba iha área ensinu ho eskluzivu iha nível superiór hodi hala’o funsaun hanorin iha estabelesimentu edukasaun ka ensinu iha tinan 2023, pontu daruak iha ona grau akadémiku baxareladu iha edukasaun iha tinan 2022 hosi Universidade Nasionál Timor-Lorosa’e iha ámbitu parseria ho INFORDEPE ka iha abilitasaun akadémika mínima ba ingresu iha dosénsia ne’ebé ho prova diploma universitáriu rekoñesidu, no pontu datoluk iha avaliasaun ikus serbisu nian, mínimu ho klasifikasaun “bom” e’ebé rejista iha Sistema Integradu Jestaun Rekursu Umanu (SIGAP, sigla Portugés) iha tinan 2022”, dehan Sekretáriu Estadu ESJESTV.  

Dadus hosi profesór kontratadu sira hamutuk na'in-1.499, balu la prienxe kritéria. Ho razaun ne’e katak, balu kontratu iha ministériu seluk, balu kontratu hela iha programa ekivalénsia, balu kartaun eleitorál dupla, konta bankária la iha, no balu mós sidadaun estranjeiru. Nune’e Ministériu Edukasaun halo hela esforsu hodi buka solusaun atu hatán ba preokupasaun profesór no profesora kontratadu hirak ne'e iha tempu badak.