Dili, 07 Setembru 2023 - Ministru Obras Públika (MOP), Samuel Marçal, apela ba funsionáriu Bee Timor-Leste (BTL, E.P) sira hotu atu nafatin sosializa kona-ba oinsá uza bee tuir padraun no regra ne’ebé mak loos ba komunidade sira hotu, atu nune'e sira labele kontinua halo ligasaun bee ilegál hodi estraga bee. MOP hato'o lia hirak ne'e iha okaziaun enkontru ho funsionáriu BTL, EP iha Kaikoli, Dili.
Samuel mós apela ba funsionáriu sira BTL, EP nian atu servisu ho responsabilidade no serví povu ho diak liután liuhosi fornese bee moos.
"Ha'u ko'alia maka'as uitoan iha BTL, EP, tanba servisu ida ne'e importante tebetebes kompara ho unidade sira seluk, tanba ita-boot sira-nia servisu liga direta ho ema nia moris, la’ós oras ba oras no minutu ba minutu, maibé segundu ba segundu ema sempre hemu bee, tanba ne'e ha'u husu ba imi […] atu servisu ho fuan ba", dehan Ministru Samuel.
Fonte: Mídia Bee Timor-Leste Empresa Publica (BTL, EP)