Dili, 24 Maiu 2022: Ministru Obras Públikas (MOP), Abel Pires da Silva, husu kompañia Catalpa ne’ebé halo dezeñu no dezenvolvimentu ba Sistema Informasaun Integradu no Jestaun Estrada (inglés, Integrated Roads Management Information Systems – IRMIS) hodi halo di’ak liu tán antes entrega ba MOP hodi hatama dadus estrada sira iha teritóriu nasionál nian.

“Husu para hadi’ak di’ak liután, tenke hatama dadus. Se [...] ita gasta osan barak depois dadus la kompletu entrega mai ita de’it, depois ita gasta tan osan millaun ba millaun hodi hadi’ak fila-fali ne’e labele, tenke kompleta tiha mak entrega bai ita”, ministru hateten lia hirak ne’e bainhira akompaña aprezentasaun hosi Estrada Rurál ba Dezenvolvimentu (ERD) kona-ba sistema IRMIS iha salaun enkontru Gabinete MOP, Kaikoli, Dili.

Sistema IRMIS dezeña no dezenvolve hosi kompañia internasionál Catalpa. Sistema refere atu fasilita planu integradu ba orsamentu, kontratu no jestaun bainhira hala’o projetu ida. Dezeñu no dezenvolvimentu sistema IRMIS ne’e finansia hosi Governu Austrália liuhosi Department Foreign Affairs and Trade (DFAT), iha programa apoiu Estrada Rurál ba Dezenvolvimentu (ERD) nian. Aprezentasaun ne’e partisipa mós hosi parte ERD, ILO, inklui tékniku sira hosi gabinete MOP.