Dili, 22 Outubru 2021 – Ministra Saúde (MS) Odete Freitas Belo, ohin (22/10), inaugura uma izolamentu ida ne’ebé konstrui iha rai éktare 5 iha Bubur-laran Luak, Same, munisípiu Manufahi, ho montante orsamentu ne’ebé gasta hamutuk $293.664.88.
MS hateten, inaugurasaun ba uma izolamentu dahuluk hala’o iha munisipiu Aileu, no inaugurasaun daruak iha munisípiu Manufahi. Iha munisípiu sira seluk daudauk ne’e iha faze prosesu kontruksaun. Inaugurasaun fatin izolamentu iha Manufahi hanesan meiu ida ne’ebé VIII Governu hamutuk no Estadu halo hodi prevene no salva povu Manufahi hosi Covid-19.
MS agradese ba Administrasaun munisípiu Manufahi tanba entrega ona rai éktare 5 ba Servísu Saúde Manufahi hodi harií fasilidade saúde, no Ministériu Saúde prontu halo planu hodi harií tán fasilidade saúde sira seluk atu fó atendementu ba komunidade sira, maibé depende ba planu hosi autoridade iha munisípiu Manufahi.
Fonte: Diáriu "Roman ba Sosiedade" Manufahi