Dili, 15 Abril 2022 – Padre pároku parokia Igreja Maria Auxiliadora, Komoro, postu-administrativu Dom Aleixo, João Roque Guterres, husu ba sarani sira atu halo reflesaun kona-ba Jesus Kristu nia terus no mate iha krúz ne’ebé hodi fó salvasaun ba ema hotu-hotu.

“Nia saran Nia-An iha krúz atu bele salva ita ema, tanba ne’e ita refleta liuliu kona-ba paixaun, terus Jesus nian iha krúz, Jesus sei la hela metin iha krúz maibé liuhosi krúz ita hotu bele hetan salvasaun,” Padre João hateten, iha sexta (15/4) ne’e, hafoin remata viasakra iha gruta Maria Auxiliadora, Komoro.

Padre pároku ne’e mós hato’o parabéns ba sarani sira ne’ebé halo devosaun ba Jesus nia terus no mate iha krúz.

“Ha’u fó parabéns ba sarani sira ne’e sira-nia devosaun barak, hotu-hotu mai partisipa la’o hodi hatudu sira-nia devosaun duni ba Jesus ne’ebé terus iha krúz,” nia dehan.

Responsável seguransa ba viasakra ne’e, Jerónimo Henrique Baptista, relata ba Timor News katak, durante viasakra la’o laiha problema ruma ne’ebé mosu hanesan tinan kotuk, tanba ne’e nia sente haksolok.

“Ita agradese tanba laiha joven sira ne’ebé mak nakar hanesan tinan kotuk, sempre provoka malu, tinan ida ne’e la akontese. Ne’e hatudu katak joven sira-nia konsiénsia di’ak no hahú iha mudansa di’ak,” Jerónimo dehan.