Dili, 10 Juñu 2021 – Primeiru-Ministru (PM) Taur Matan Ruak hateten katak Timor-Leste nia preparasaun atu partisipa iha Expo Dubai 2021 ne’e hahú kedas iha tinan 2018 no ida ne’e nu’udar oportunidade atu projeta Timor-Leste nia poténsia ba nasaun sira iha médiu oriente, tanba ne’e laiha razaun atu kansela derepente.
“Tuir ha’u-nia hanoin, sei laiha razaun ba ita hapara, ita mantéin prosesu ida ne’e tanba diskute kedas wainhira ha’u sai Primeiru-Ministru, primeiru hasoru mak konsul Líbanu, nia mak lori kedas ideia ne’e iha 2018, entaun tinan barak ona ita investe, tanba ne’e la fásil ita atu deside buat ne’ebé ita la’o dook ona, ita deside derepente kansela ne’e susar,” dehan PM Taur hafoin hasoru malu ho Prezidente Repúblika Francisco Guterres Lú Olo ohin (10/6) iha Palásiu Prezidensiál, Dili.
Xefe Governu ne’e mós akresenta katak Timor-Leste nia partisipasaun iha Expo Dubai ne’e sei halo ema koñese Timor-Leste di’ak liután.
Fonte: Mídia Gabinete do Primeiro-Ministro (GPM)