Dili, 01 Setembru 2023 - Primeiru Ministru (PM), Kay Rala Xanana Gusmão fó orientasaun ba Ministériu Obras Públika (MOP), Ministériu Planeamentu Investimentu Estratéziku (MPIE) no Ministériu Saúde (MS) atu halo reabilitasaun ho urjénsia ba rezidénsia médiku kubanu sira-nian iha Bidau Toko-baru, tanba uma kakuluk komesa kuak, plafón dodok, inklui moru protesaun hahú naksobu. Orientasaun ne'e PM Xanana fó hafoin hamutuk ho Ministru Obras Públika, Samuel Marçal, Ministru Planeamentu Investimentu Estratéziku, Gastão Sousa no Ministra Saúde, Élia dos Reis Amaral hala’o vizita hodi observa direta ba rezidénsia médiku kubanu sira-nian iha Sesta (01/09) iha Bidau Toko-baru, Dili.
Hafoin observa tiha, Ministru Obras Públika, koordena kedas ho Ministru Planeamentu Investimentu Estratéziku no Ministra Saúde, hodi halo preparasaun atu reabilita iha semana ida ne’e.
Rezidénsia ne’e halo hahú hosi tempu okupasaun Indonézia nian, kompostu hosi uma tolu, no coby house rua.
Fonte: Mídia Gabinete do Primeiro-Ministro (GPM)