Dili, 21 Outubru 2021 – Komandante Polísia Nasionál Timor-Leste Munisípiu Dili, Superintendente Xefe Henrique da Costa, husu ba komunidade sira atu labele lori tua ba hemu iha rate iha loron finadu hodi kria fali problema iha rate laran.
"Ba rate la presiza lori tua ba iha ne’ebá. Tua hemu ne’e hemu kedas iha uma mak ba ka la hemu ne’e di’ak liután. Tanba ne’e la presiza atu lori fali tua ba hemu fali iha rate selae kria fila-fali problema,” Henrique da Costa informa ba jornalista Timor News, ohin (21/10) iha nia knaar-fatin, Dili.
Nia hateten katak parte Komandu PNTL munisípiu Dili oras ne’e prepara ona atu asegura loron matebian ne’e iha fatin hotu-hotu liuliu relasiona ho selebrasaun misa, movimentu transporte iha situasaun iha semitériu.
“Komandu munisípiu Dili prepara ona planu operasaun ba ida ne’e,” nia dehan.
Fonte: Timor News