Dili, 28 Outubru 2021: Vise-Reitór ba Asuntu Akadémiku no Garantia Kualidade, Universidade Nasionál Timor Lorosa’e (UNTL), Samuel Venâncio de S. Freitas, informa katak posibilidade UNTL sei realiza graduasaun ba dala-XXV iha fulan Dezembru tinan 2021, no la’os iha fulan Novembru tanba seidauk hatama dadus ba Ministériu Ensinu Superiór, Siénsia no Kultura (MESSK).

“Ne’e seidauk klaru tanba sira foin trata no ema balu sei ezame hela, sira sei hatama (dadus), ita atu define data (ba graduasaun nian) maibé ema balu sei ezame. Maibé ita hatene katak regra ne’e atu realiza graduasaun tenke hatama dadus fulan ida antes. Sé agora atu Novembru mak hatama (ba Ministériu) entaun só Dezembru mak ita halo. […] Tanba ne’e dalaruma iha Dezembru,” Samuel Freitas relata ba jornalista Timor News, ohin (28/10) iha nia knaar-fatin, UNTL Sentrál, Dili.

Nia akresenta katak kona-ba totál kandidatu ba graduasaun hosi UNTL nian rasik estimadamente besik 600, no sura ho INFORDEPE ninian ne’ebé UNTL mak fó graduasaun ne’e hamutuk 2.000 resin, nune’e kandidatu ba graduasaun tuir mai ne’e barak tebes.