Dili, 11 Setembru 2023 - Prezidente Repúblika (PR), José Ramos Horta, Segunda ohin (11/09) iha Palásiu Aitarak-laran, Dili, fó pose ba membru konsellu estadu hamutuk na'in-14 hanesan orgaun konsultivu Prezidente Repúblika nian ba asuntu polítika, bazeia ba konstituisaun RDTL artigu 90 no 91, no membru konsellu superiór defeza no seguransa na'in-13 hanesan orgaun konsultivu Prezidente Repúblika nian ba asuntu defeza, seguransa no soberánia, bazeia ba Konstituisaun RDTL artigu 148. Membru hirak ne'e sei halao sira-nia mandatu durante tinan lima.
Membru na'in-14 hosi konsellu estadu nian mak hanesan, Prezidente Parlamentu Nasionál, Maria Fernanda Lay, Primeiru Ministru, Kay Rala Xanana Gusmão, eiz Prezidente Repúblika, Majór Jenerál Taur Matan Ruak, eiz Prezidente Repúblika, Francisco Guterres Lú-olo, Abilio da Conceição de Araujo, Maria Domingas Fernandes Alves (Mikato), Tenente Jenerál Tito da Costa Cristovão (Lere Anan Timur), Madre Guilhermina Marçal, Milena Pires, Virgilio Smith (Kranek), Jacinto Viegas Vicente (Roke) Nominando S. Martins (Buras), Ricardo da Costa Ribeiro, no Josefa Alves Pereira Soares.
Membru ba Konsellu Superiór Defeza no Seguransa hamutuk na'in-13 ne'e mak hanesan, Primeiru Ministru, Kay Rala Xanana Gusmão, Ministru Negósiu Estranjeiru no Kooperasaun, Bendito dos Santos Freitas, Ministru Defeza, Contra Almirante, Donaciano do Rosário Gomes, Ministru Interiór, Francisco da Costa Guterres, Ministru Justisa, Amándio de Sá Benevides, reprezentante hosi Parlamentu Nasionál Deputada Maria Terezinha da Silva Viegas, David Mandati Dias Ximenes, Duarte Nunes, Xefe Estadu Maiór Jenerál F-FDTL, Tenente Jenerál Falur Rate Laek, Komandante Jerál PNTL, Komisáriu Henrique da Costa, Diretór Jerál Servisu Nasionál Intelijénsia, Longuinhos Monteiro, Júlio Tomás Pinto no Nuno Manuel Corvelo de Andrade Sarmento.
Reuniaun konsellu estadu no konsellu superiór defeza no seguransa sei prezide hosi Prezidente Repúblika, hafoin fó pose ba membru foun sira. Prezidente Repúblika kontinua kedas lidera reuniaun ba dahuluk hamutuk ho membru konsellu rua hodi ko’alia kona ba funsaun membru sira nian bazeia ba lei no rejimentu.
Fonte: Mídia Gabinete do Primeiro-Ministro (GPM)