Suisa, 04 Outubru 2023 - Prezidente Repúblika (PR), José Ramos Horta, hasoru malu ho Diretór Jerál Organizasaun Mundiál Saúde (OMS), Tedros Adhanom Ghebreyesus, iha eskritóriu OMS iha Zenebra, Suisa hodi diskute no hametin kooperasaun entre Timor-Leste ho OMS iha setór saúde ninian. Horta hato'o ba DJ OMS kona-ba Timor-Leste nia susesu iha kombate moras sira ne’ebé bele prevene hanesan tuberkuloze, malária inklui hato’o mós Timor-Leste nia asaun kampaña nasionál ba susubeen inan iha Timor-Leste.
Ghebreyesus apresia ho asaun ne'ebé Timor-Leste iha kona-ba kombate moras sira ne'ebé mak bele prevene, no nia mós hato'o kompromisu katak OMS sei apoiu governu Timor-Leste, liuliu ministériu saúde hodi hadi'a Timoroan sira-nia saúde. Sorumutu ne'e hanesan pasu pozitivu ida hodi hametin liután relasaun entre Timor-Leste ho OMS, no hein katak sei lori dalan foun no inovadór atu hadi'a rezultadu saúde iha Timor-Leste.
Fonte: Mídia Presidente da Repúblika (PR)