Lautein, 29 Setembru 2023 - Sekretáriu Estadu Eletrisidade Bee no Saneamentu (SEEAS, sigla portugés), Santos Noronha, kompromete katak Governu ba dasia fó atensaun másimu ba Illa Jaco tanba illa refere la'os de’it riku ho natureza hanesan balada fuik,  maibé iha mós rikusoin seluseluk tan, hanesan valór istóriku ne’ebé mak bele atrai turista sira hodi bele vizita. Tanba ne'e governu sei halo munutensaun ba fasilidade sira ne'ebé mak konstrui tiha ona hanesan barraka, hariis fatin, lampu sira ne'ebé mak kondisaun at tiha ona no fornese bee moos hodi vizitante sira bele uza, inklui animál rusa sira bele hemu.

“Parte ida ne’ebé ita presiza halo mak hadi'ak fasilidade sira ne’ebé mak iha, nune’e bele fasilita fatin ida ne’e para turista sira bele mai beibeik, fatór ida ne’ebé importante liu mak bee no eletrisidade. Iha fatin balu eletrisidade iha no di’ak ona, sei falta de’it mak bee, kuandu bee laiha konserteza ita labele atrai turista sira hodi bele mai vizita”, hateten Santos Noronha iha Sesta (29/09) ne'e bainhira halo vizita hodi observa direta kondisaun illa Jako nian.

Santos Noronha hateten tan katak, atu fornese bee moos ba iha illa Jako presiza halo estudu ida klean, nune'e tenke iha planu ho parte tékniku sira para bele halo estudu didi’ak, bee matan ne’ebé mak iha tenke identifika nia débitu bee ne’e bele dada ba to’o iha fatin refere. Planu seluk mak halo kanalizasaun sub mariña hodi dada bee hosi tasi okos.